Artıq uzun müddət davam edən Polis Akademiyasına qəbul marafonu uğurla yekunlaşıb.  “Daxili İşlər Nazirliyi sistemində təhsilə və xidmətə təşviq işinin təşkili” Qaydalarına uyğun olaraq, Azərbaycan Respublikasının bütün şəhər və rayonlarında Polis Akademiyasında təhsil almağın üstün cəhətləri barədə təbliğat-təşviqat xarakterli silsilə tədbirləri keçirilib. Şübhəsiz ki, bu tədbirlər nəticəsində Akademiyaya maraq daha da artıb. Polis Akademiyası 2024-2025-ci il üçün 500 nəfər kursantı qəbul edib.

Daxili işlər orqanlarında təhsilə və xidmətə yararlılığı nəzərə alınaraq seçilən 2250 namizəddən 500 nəfər Akademiyanın “Hüquqşünaslıq” ixtisasına qəbul olub. Keçid balı 451,9 olub, bu da ötən tədris ili ilə müqayisədə tələbə qəbulunun 200 nəfər artırılmasına baxmayaraq keçid balının 12,6 bal yüksəlməsi deməkdir. Ən yüksək nəticə 665,7 bal olub, abituriyentlərdən 50 nəfəri 600-dən (ötən illə müqayisədə 36 nəfər çox) yuxarı bal toplayıbdır.
Hal-hazırda bütün kursantlar Akademiyaya dəvət olunub və tədris başlayana qədər onların hazırlıq mərhələsinə başlanılıb.