Akademiyanın daimi heyəti, kursantları, qiyabi təhsil və ixtisasartırma kursunun dinləyiciləri ilə Azərbaycan Respublikası Təhsil İnstitutunun Psixologiya və Xüsusi Təhsil Şöbəsinin müdiri, psixologiya elmləri doktoru Elxan Bəylərovla silsilə seminarlar təşkil olunmuşdur.

Psixologiya elmləri doktoru E.Bəylərov  plan üzrə seminar iştirakçılarının spesifik xüsusiyyətlərini nəzərə alaraq müxtəlif mövzularda mühazirələr oxumuşdur. Mühazirəçi seminar iştirakçılarına maarifləndirici məlumatlar verərək bildirmişdir ki, mənfi hiss və emosiyalarımız bizim əhval-ruhiyyəmizə daim zərərverici təsir göstərərək akademik göstəricilərin aşağı düşməsinə səbəb olur. Bu cür hiss və emosiyalardan qurtulmağın yolları isə daimi özünüdərk prosesindən, insanın özünü tanımasından keçir. Özümüzü tanıdıqca, keçirdiyimiz hisslərin fərqinə vardıqca onları nəzarət altında saxlamaq və idarə etməkdə daha asan baş verir.

Qonaq seminar iştirakçılarına stres və onun yaranma səbəbləri, stresə yol açan faktorlarla necə mübarizə aparılacağı barədə geniş məlumat vermiş, hər bir kateqoriyaya aid psixoloji narahatlıqlar dinlənilmiş, ilkin psixoloji yardım göstərilmiş, həmçinin onları maraqlandıran bir sıra suallar cavablandırılaraq istiqamətlər verilmişdir.
Psixologiya elmləri doktoru E.Bəylərovla  Akademiyanın daimi heyəti, kursantları və qiyabi təhsil dinləyiciləri ilə silsilə seminarlar davam edir.