27 may 2022-ci il tarixdə Rusiya Daxili İşlər Nazirliyinin İdarəetmə Akademiyasında “Təhsil fəaliyyətinin təşkilinin aktual məsələləri” adlı onlayn formatda beynəlxalq elmi-metodiki konfrans keçirilmişdir. Konfransda Rusiyanın və digər ölkələrin 30-dan çox ali təhsil müəssisələrinin nümayəndələri iştirak edirdi. Konfransda DİN-in Polis Akademiyasının Tədris-metodiki şöbəsinin rəisi, polis polkovniki Fərhad Əliyev və Elmi-tədqiqat və redaksiya-nəşriyyat şöbəsinin rəisi, h.ü.f.d., dos., polis polkovniki Hikmət Eyvazov onlayn formatda iştirak edirdi.

Konfrans Rusiya Federasiyası Prezidenti yanında Elm və Təhsil Sahəsində Gənclərlə İş üzrə Koordinasiya Şurası və Rusiya Daxili İşlər Nazirliyinin İdarəetmə Akademiyasının ilkin həmkarlar ittifaqı təşkilatı tərəfindən təşkil olunmuşdu.
Konfransda professor-müəllimlər və digər iştirakçılar tərəfindən “Müəllimin ünsiyyəti”, “Səs təlimi. Elmi və pedaqoji işçinin ritorik mədəniyyətinin inkişafı”, "Ekstremal vəziyyətlərdə danışıqlar fəaliyyəti", “Dərs üçün effektiv multimedia təqdimatının hazırlanması” və digər mövzularda çıxışlar dinlənildi.
Konfrans sonra öz işini “Universitetdə tədris prosesinin elmi-metodiki təminatı”, “Ali təhsil müəssisələrində innovativ təhsil texnologiyaları”, “Universitetdə tədris prosesinin metodiki təminatının təkmilləşdirilməsi” adlı bölmə iclaslarında davam etdirmişdir.
Konfrans öz işini müzakirələrdən sonra başa çatdırıb.