Polis Akademiyasında 27 Sentyabr - Anım Günü ilə əlaqədar tədbir keçirilib. Anım tədbirində Akademiyanın rəhbərliyi, əməkdaşları, professor-müəllim heyəti və kursantları iştirak edib.
Tədbirdə əvvəlcə 44 günlük Vətən müharibəsində canlarından keçən bütün şəhidlərin xatirəsi bir dəqiqəlik sükutla yad edilib və Azərbaycan Respublikasının Dövlət himni səsləndirilib.
Polis Akademiyasının rəisi, polis general-mayoru Canpolad Daanov tədbir iştirakçılarını salamlayıb və bildirib ki, iki il bundan əvvəl 27 sentyabr 2020-ci ildə Ermənistan Azərbaycana qarşı hərbi təxribat törədərək bizim döyüş mövqelərimizi və yaşayış məntəqələrimizi atəşə tutmuşdur. Bu qanlı cinayətə cavab olaraq Azərbaycan Ordusunun genişmiqyaslı əks-hücum əməliyyatının başlanılmasına dair tarixi qərar qəbul olunmuşdur. 44 gün davam edən İkinci Qarabağ müharibəsində Azərbaycan Ordusu və xalqı Qələbə qazanmışdır. İkinci Qarabağ müharibəsi bizim şanlı tariximizdir. Bu Qələbə tarixdə əbədi qalacaq. Azərbaycan Silahlı Qüvvələri 44 gün ərzində düşmən ordusunu məhv edərək öz ərazi bütövlüyünü bərpa etdi. Düşmən torpaqlarımızdan qovuldu, ədalət və beynəlxalq hüquq bərpa olundu. Azərbaycan Ordusu şəhidlərin qanını aldı. Dövlətimiz şəhidlərin xatirəsini əbədiləşdirmək üçün bütün lazımi tədbirlər görmüşdür. 2020-ci il dekabrın 2-də Cənab Prezidentin müvafiq Sərəncamı ilə sentyabrın 27-si Azərbaycanda Anım Günü kimi təsis edilmişdir. Biz şəhidlərimizi öz qəlbimizdə əbədi saxlayacağıq.

Tədbirdə çıxış edən Akademiyanın “İctimai elmlər” kafedrasının rəisi, polis polkovnik-leytenantı Rəhim Məcnunov Vətən müharibəsi şəhidlərinin Anım Günü və 44 günlük Vətən müharibəsi ilə bağlı iştirakçılara məlumat verərək qeyd edib ki, 2020-ci il sentyabrın 27-dən Ermənistanın ölkəmizə qarşı başlayan növbəti hərbi təcavüzünə cavab olaraq, Ali Baş Komandanın rəhbərliyi altında Azərbaycan Silahlı Qüvvələrinin işğal altındakı torpaqlarımızın azad edilməsi uğrunda Vətən Müharibəsi başladı. Müzəffər Ali Baş Komandan İlham Əliyevin rəhbərliyi ilə rəşadətli Ordumuz 44 günlük Vətən müharibəsində qəhrəmanlıq tariximizin ən şanlı səhifələrini yazıblar. Qısa müddət ərzində sarsıdıcı zərbələrlə düşməni doğma torpaqlarımızdan qovub çıxaran cəsur Vətən övladları ölkəmizin ərazi bütövlüyünün təmin edilməsi yolunda böyük qəhrəmanlıq, vətənpərvərlik və fədakarlıq nümunələri ortaya qoyublar. Bütün şəhidlərin əziz xatirəsinin daim dərin ehtiramla anıldığını və onların adlarının hər zaman uca tutulacağını bildirən polis polkovnik-leytenantı R.Məcnunov qəhrəman Vətən övladlarının döyüş şücaətlərinin təbliğ edilməsinin vətənpərvər gənc nəslin yetişdirilməsində xüsusi önəm kəsb etdiyini vurğulayıb.
Tədbirlərin davamı olaraq Akademiyada Vətən müharibəsi şəhidlərinin Anım Günü və 44 günlük Vətən müharibəsinə həsr olunmuş dərslər keçirilmiş, Akademiya ərazisində yerləşdirilən monitorlarda daimi və dəyişən heyət tərəfindən izlənilməsi üçün videoçarxlar nümayiş olunmuş, struktur qurumların rəhbərləri tərəfindən tabelikdə olan əməkdaş və kursantlarla söhbətlər aparılmış, Akademiyanın bir qrup əməkdaşı Şəhidlər Xiyabanını ziyarət edərək şəhidlərimizin əziz xatirəsini yad etmişlər.

Vətən müharibəsi şəhidlərinin Anım Günü ilə əlaqədar silsilə tədbirlərin davamı olaraq Akademiyanın əyani fakültəsinin 1-ci kurs kursantları ilə Vətən müharibəsi iştirakçıları baş çavuş Paşa İmanov, çavuş Ramiz Həsənov, Anar Mamedov və Vüsal Eyniyev arasında görüş keçirilmişdir. Görüşdə iştirak edən Vətən müharibəsi iştirakçıları torpaqlarımızın azad edilməsi uğrunda aparılan əks-hücum əməliyyatlarında iştiraklarından və 44 günlük haqq savaşımızda vətənpərvər oğullarımızın igidliyindən söhbət açıblar.

Qeyd edək ki, 27 Sentyabr – Anım Günü ilə əlaqədar olaraq Akademiyanın təsdiq edilmiş müvafiq tədbirlər planı çərçivəsində çoxsaylı silsilə tədbirlər davam edir.