01 iyun 2024-cü il tarixində Bilgah Beach Hoteldə Azərbaycan Kibertəhlükəsizlik Təşkilatları Assosiasiyasının təşkilatçılığı ilə "Yaşıl dünya naminə həmrəylik ili"nə həsr olunmuş “III Milli Kibertəhlükəsizlik Forum”u keçirilib.

350 nəfərdən çox mütəxəssisin iştirak etdiyi forumda Polis Akademiyasını DİO-da əməliyyat-axtarış fəaliyyəti kafedrasının rəisi, polis polkovnik-leytenantı Orxan Məmmədov və Mülki Hüquq kafedrasının baş müəllimi, polis polkovnik-leytenantı Elmar Abdalov təmsil edib.

Forumun əsas məqsədini kibertəhlükəsizlik ekosisteminin inkişafına töhfə verən qurum, təşkilat və şirkətlərin, eləcə də tərəfdaş ölkələrin nümayəndələri və ekspertləri ilə birgə müzakirələrin həyata keçirilməsi təşkil edib.

Forum çərçivəsində “Azərbaycan Respublikasının kibertəhlükəsizlik ekosistemi”, “Kritik informasiya infrastrukturunun təhlükəsizliyinə dair Türk Dövlətləri Təşkilatına üzv dövlətlərin təcrübəsi”, “Kibertəhlükəsizlik sahəsində beynəlxalq əməkdaşlıq”, “Kibertəhlükəsizlik üzrə təhsil və insan resursları” və “Kiberdiaspora” adlı panellərdə müzakirələr baş tutmuşdur.

Forum zamanı “Kibertəhlükəsizlik Platforması”, “Cybernetics” və s. şirkətlərin, eləcə də “İnformasiya Təhlükəsizliyi” ixtisası üzrə digər ali təhsil müəssisələrinin əməkdaşları ilə məlumat mübadiləsi aparılmış,  əməkdaşlıq platformasının yaradılması istiqamətində bir sıra təkliflər müzakirə olunmuşdur.