16 oktyabr 2021-ci il tarixdə Akademiyanın kursantları ilə Azərbaycanın Daxili İşlər Nazirliyinin Daxili Qoşunlarının polkovniki, Vətən müharibəsi qazisi, Vətən Müharibəsi Qəhrəmanı Zəfər Yusibovun görüşü keçirilmişdir.
Tədbirdə Akademiyanın şəxsi heyəti tərəfindən Ulu öndər Heydər Əliyevin və Vətən Müharibəsi şəhidlərinin xatirəsi bir dəqiqəlik sükutla yad edilmiş və Dövlət Himni səsləndirilmiş, daha sonra Polis Akademiyası rəisinin müavini, polis polkovniki İlyas İsayev tədbiri açıq elan edərək  II Qarabağ Müharibəsi ilə bağlı şəxsi heyət qarşısında çıxış etmişdir.
Daha sonra Vətən müharibəsi qazisi Zəfər Yusibov müzəffər ordumuzun Böyük Vətən Müharibəsində göstərdiyi şücaət və rəşadətini əks etdirən tarixi anları kursantlarla  bölüşmüşdür.

Vətən Müharibəsi Qəhrəmanı Zəfər Yusibov çıxışında kursantlara Vətən müharibəsi dövründə xalqın Ali Baş Komandanın ətrafında bir yumruq kimi birləşdiyini, 2020-ci ilin sentyabr ayının 27-də düşmən qüvvəsinin atəskəsi pozması nəticəsində Azərbaycan Silahlı Qüvvələrinin əks hücumu ilə Vətən müharibəsinin başladığını və bütün orduya həyəcan siqnalının verildiyini, düşmənin mövqelərinə doğru qarlı, dumanlı, göz-gözü görməyən havalarda belə misli görünməmiş qəhrəmanlıq və mərdliklə vuruşduqlarını, müharibənin itkisiz olmadığını və qələbənin qurbansız qazanılmadığını bildirmişdir.
Qonaq torpaqlarımızın azad olunmasında canlarından keçən şəhidlərimizə Allahdan rəhmət, qazilərimizə şəfa, güc və qüvvət dilədiyini, Azərbaycan Respublikasının üşrəngli bayrağının Azərbaycanın işğaldan azad olunmuş ərazilərdə dalğalanmasından qürur və fəxarət hissi keçirtdiyini qeyd etmişdir.
Tədbirin sonunda xatirə şəkilləri çəkilmişdir.