2022-ci ilin 11 – 15 iyul tarixlərində Macarıstanın Budapeşt şəhərində Avropa İttifaqı Hüquq-Mühafizə Təlimləri üzrə Agentliyi (CEPOL) tərəfindən “Təlimçilər üçün təlim” adlı təlimdə Azərbaycan nümayəndə heyətinin tərkibində Dövlət Gömrük Komitəsinin 2 əməkdaşı və DİN-in Polis Akademiyasının Beynəlxalq əməkdaşlıq bölməsinin rəisi, polis polkovnik-leytenantı Orucov Elçin Meyvəddin oğlu iştirak etmişdir. Ümumilikdə Moldova, Gürcüstan, Azərbaycan və Ermənistandan olan nümayəndələrin iştirakı ilə keçirilən 5 günlük təlim CEPOL-un TOPCOP layihəsi çərçivəsində həyata keçirilmişdir. 

Müasir dövrdə onlayn və üzbəüz təlim üsulları, istifadə olunan proqram təminatları və ümumilikdə dərsin idarə edilmə tövsiyələrini əhatə edən, eyni zamanda təcrübə mübadiləsi xarakteri daşıyan bu təlimdə ekspertlər tərəfindən əsasən onlayn təhsildə istifadə olunan proqram təminatları və bu işin asanlaşdırılması üçün beynəlxalq təcrübədən misallar verilmiş, müxtəlif tapşırıqlar əsasında simulyasiya xarakterli tapşırıqlar icra edilmişdir. Belə ki, təlim boyunca elektron təhsilin əsas komponentləri, dərsin idarə edilmə platformaları, “ADDİE” (Təhlil, Dizayn, Hazırlama, Tətbiq etmə və Qiymətləndirmə), “ABC” (Əldə etmə, Müzakirə, Araşdırma, Hazırlama, Qruplarla iş və Təcrübə), Qarışıq öyrənmə modeli (elektron olaraq tələbələrin zəruri materiallarla təmin edilməsi, onlayn və üzbəüz dərslər) kimi tədris modelləri və s. mövzular geniş müzakirə edilmiş, bu sahədə bilik və bacarıqların artırılması üçün Təlimçi ekspertlər tərəfindən müxtəlif yarışlar keçirilmişdir. Eyni zamanda dərsin planlaşdırılması, ehtiyacların müəyyən edilməsi, tələbələrin müxtəlif vasitələrlə (hədiyyələrin verilməsi, müəyyən vəzifələrə təyin olunmaları, mükafatlandırılmaları və s.) motivasiya edilməsi məqamlarına toxunulmuşdur. Dərslərin daha rəngarəng keçirilməsi məqsədilə internet üzərindən ictimaiyyətə açıq təlim saytlarının (“Moodle”, “Kahoot”, “Canva”, “Mentimeeter”, “Slido”, “H5p.org” və s.) imkanlarından istifadə edərək dərslərin təşkil edilməsi müasir günümüzün tələblərinə uyğun olduğu bildirilmişdir. Daha sonra Avropa İttifaqı Hüquq-Mühafizə Təlimləri üzrə Agentliyinin (CEPOL) rəsmi internet səhifəsində (https://leed.cepol.europa.eu/) keçirilməsi nəzərdə tutulan təlim proqramları barədə yenilənmiş məlumatların yerləşdirildiyi və müvafiq hüquq-mühafizə orqanlarının əməkdaşlarının bu saytda qeydiyyatdan keçərək təlim imkanlarından faydalana biləcəkləri təlim iştirakçılarının nəzərinə çatdırıldı. Hüquq-mühafizə orqanlarının əməkdaşları üçün təşkil edilən vebinar və digər onlayn təlimlərin təşkilində təhlükəsizlik imkanlarının da daim diqqətdə saxlanılmalı olduğu vurğulandı.

Təlimin gedişatında Polis Akademiyasının əməkdaşı Akademiya barədə təqdimatla çıxış edərək hazırlanmış video roliki həm təlim iştirakçıları, həm də ekspertlərə nümayiş etdirmişdir. Bundan sonra Akademiya barədə qısaca məlumat verərək burada yetişən gələcək polis zabitlərinin beynəlxalq səviyyədə təlimlərə cəlb olunaraq beynəlxalq təcrübəni öyrənə biləcəklərini və gələcək xidməti fəaliyyətlərində istifadə edəcəklərini vurğulamışdır. Təqdim olunan tanıtım çarxının nəticəsi olaraq Gürcüstan və Moldova nümayəndələri Akademiya ilə daha sıx əməkdaşlıq imkanlarını nəzərdən keçirəcəklərini bildirdilər.    
Tədbirin sonunda uğurlu iştiraka görə iştirakçılara “Təlimçilərin təlimi” sertifikatları təqdim edilmişdir.
Ümumilikdə təlim işgüzar və səmərəli şəkildə baş tutmuşdur.