29 iyul 2022-ci il tarixində Polis Akademiyasında II кurs kursantları ilə “İctimai qaydanın qrup halında pozulmasının qarşısının alınması və ictimai təhlükəsizliyin təmin olunması üzrə xüsusi əməliyyatda şəxsi heyətin fəaliyyəti” mövzusunda əməliyyat taktiki təlim keçirilmişdir. Kursant heyətindən ibarət xüsusi yaradılmış qruplarla keçirilmiş  nümunəvi-göstərici təlimin məqsədi kursantların mənəvi-psixoloji durumunu, eyni zamanda döyüş hazırlığı səviyyəsinin artırılmasının yoxlanılması təşkil etmişdir. Keçirilən təlimlər kursantlarda hərbi bilik və bacarıqların, peşə vərdişlərinin daha da artırılmasında əhəmiyyətli rol oynayır.

Tədbirlər planına uyğun olaraq təşkil ounmuş təlimdə kursantlar xüsusi qruplara bölünərək fəaliyyəti üzrə iştirak etmiş, eyni zamanda silah, sursat və xüsusi vasitələrdən məharətlə istifadə etmiş, bölmələr ərazidə müxtəlif üsullarla taktiki yerdəyişmə və digər tapşırıqları uğurla yerinə yetirmişlər. Təlimdə komandir və qərargah üzvlərinin bilik və bacarıqlarının təkmilləşdirilməsi, eləcə də onların əməliyyatın planlaşdırılması və vəziyyətin qiymətləndirilməsi üzrə  bacarıqlarının inkişaf etdirilməsinə nail olunmuşdur.          

Təlimin nəticələrinə Polis Akademiyasının rəisi, polis general-mayoru C.Daanov yekun vuraraq qeyd etmişdir ki, taktiki təlimlərin keçirilməsində əsas məqsəd gələcək polis zabitlərinin döyüş hazırlığının yüksək səviyyədə saxlanılması və praktiki vərdişləri təkmilləşdirməklə yanaşı, müasir silah, xüsusi vasitələr və texnikalar ilə yaxından tanış etmək, istismar qaydalarını, döyüş tətbiqi üsullarını öyrətməkdir.

Sonda ümumi fəaliyyətlər təhlil edilmiş, qarşıya qoyulan tapşırıqların müvəffəqiyyətlə yerinə yetirildiyi qeyd olunmuşdur.
Polis Akademiyasının kursantlarının hərbi bilik və bacarıqlarınin artırılaraq döyüş hazırlığı səviyyəsinin inkişaf etdirilməsi, habelə mənəvi-psixoloji durumunu lazımı səviyyədə qoruyub saxlanılması məqsədilə bu növ təlimlərin gələcəkdə də mütəmadi olaraq davam etdirilməsi nəzərdə tutulur.