Sentyabrın 15-də Daxili İşlər Nazirliyinin Polis Akademiyasında Bilik günü və əvvəllər daxili işlər orqanlarında xidmət etməmiş I kurs kursantlarının “Polis Andı»nı qəbul etmələri ilə əlaqədar təntənəli mərasim keçirilmişdir.
Əvvəlcə torpaqlarımızın azadlığı uğrunda şəhidlik zirvəsinə ucalan igid oğullarımızın, həmçinin xidməti tapşırıqları yerinə yetirərkən həlak olan həmkarlarımızın əziz xatirəsi bir dəqiqəlik sükutla yad olunub, Azərbaycan Respublikasının dövlət himni ifa edilib.

Akademiyanın rəisi, polis general-mayoru Canpolad Daanov yeni tədris ilinin başlanması münasibətilə Azərbaycan Respublikasının daxili işlər naziri, general-polkovnik cənab Vilayət Eyvazovun təbrikini şəxsi heyətə çatdırmışdır.
Ötən dövr ərzində əldə olunmuş nailiyyətlərə toxunan Akademiya rəisi peşəkar polis kadr hazırlığı istiqamətində qarşıya qoyulmuş vəzifələrin bundan sonra da əzmlə yerinə yetirilməsinin vacibliyini vurğulamışdır.

Kursantlar adından çıxış edən beşinci kursun əlaçı kursantı Süleyman Süleymanov ölkə və daxili işlər nazirliyi rəhbərliyinin diqqət-qayğısı sayəsində maddi-texniki bazası günü-gündən təkmilləşən Polis Akademiyasında əldə etdikləri bilik və bacarıqların gələcəkdə polis zabiti kimi xalqa və dövlətə xidmət kimi müqəddəs bir vəzifənin ləyaqətlə yerinə yetirilməsinə zəmin yaratdığını qeyd etmişdir.

 

Sonra Akademiya rəisi ötən tədris ilini əla qiymətlərlə başa vurmuş 3 kursanta “Əlaçı kursant”, idmanda qazandıqları uğurlara görə isə 5 kursanta “İdmançı kursant” döş nişanı, eləcə də qəbul imtahanında 650-dən yüksək bal toplamış 4 kursanta qiymətli hədiyyələr təqdim etmişdir.

I kurs kursantlarının "Polis Andı”nı qəbul etməsi ilə tədbir davam etmişdir. I kurs kursantı Elgiz Hüseynzadə çıxış edərək bu əlamətdar gün münasibətilə kurs yoldaşlarını təbrik etmişdir.
Tədbirdə “Polis Akademiyasının marşı” səsləndirilmiş və şəxsi heyətin təntənəli marş keçidi ilə başa çatmışdır.