Azərbaycan Respublikası Daxili İşlər Nazirliyinin “Daxili işlər orqanlarında peşə hazırlığının təşkili haqqında” Təlimatına əsasən Polis Akademiyasında 15 sentyabr 2022-ci il tarixindən 15 dekabr 2022-ci il tarixinədək Rusiya Federasiyası DİN-in xüsusi təyinatlı ali təhsil müəssisələrinin məzunlarının “Xüsusi hazırlıq” kursu təşkil olunmuşdur.
Kursda Rusiya Federasiyası DİN-in Rostov Hüquq, Voronej institutları, Volqoqrad, Nijeqorod Akademiyaları və Sank-Peterburq Universitetinin məzunları “Xüsusi hazırlıq” kursunu keçmişdir. 

Qeyd olunan kursun məqsədi bu məzunlara polisin fəaliyyəti ilə bağlı Azərbaycan Respublikasının qanunvericiliyinin öyrədilməsi olduğundan 3 ay müddətində dinləyicilərə 15 istiqamət üzrə (“Cinayət hüququ”, “Cinayət prosessual hüquq”, “Kriminalistika”, “Mülki və ailə hüququ”, “DİO-nun inzibati fəaliyyəti”, “DİO-da əməliyyat axtarış fəaliyyəti”, “DİO-da insan hüquqlarının təminatı”, “Azərbaycan dili və nitq mədəniyyəti”, “İnzibati məsuliyyət”, “Döyüş hazırlığı”, “Müasir informasiya texnologiyaları”, “Konstitusiya hüququ”, “DİO-da xüsusi texnika”, “Kriminologiya və cinayətlərin profilaktikası” və “DİO-da peşə etikası”) mövzuları planlaşdırılaraq dərslərin keçirilməsi təmin edilmişdir.

15 dekabr 2022-ci il tarixində “Xüsusi hazırlıq” kursunu bitirmiş məzunlarla keçirilən tədbirdə DİN-in Polis Akademiyası rəisinin birinci müavini, polis polkovniki Vüqar Mansurov iştirak etmiş və dinləyicilərə öz dəyərli tövsiyyələrini verərək onlara gələcək fəaliyyətlərində uğurlar arzulamışdır.
Tədbirin sonunda məzunlara sertifikatlar təqdim olunmuşdur.