24 oktyabr 2023-cü il tarixində Polis Akademiyasında kursantların detektiv əsərlərə olan marağı nəzərə alınaraq uzun müddət prokurorluq orqanlarında müxtəlif vəzifələrdə çalışan və hal-hazırda aktiv yaradıcılıq fəaliyyəti ilə məşğul olan, Azərbaycan Respublikası prezidentinin sərəncamı ilə dövlət mükafatına layiq görülmüş yazar Müşfiq Abbasov ilə görüş keçirilib. Tədbirdə Akademiyanın müəllimləri və kursantları iştirak ediblər.

İlk olaraq DİO-da əməliyyat-axtarış fəaliyyəti kafedrasının rəisi, polis        polkovnik-leytenantı Orxan Məmmədov tədbir iştirakçılarını salamlayıb və qonağı onlara təqdim edib.
Sonra söz müəllifə verilib. Müşfiq Abbasov ilk öncə Polis Akademiyasının rəhbərliyinə öz təşəkkürünü bildirib və polis peşəsinin önəmliliyini və şərəfliliyini xüsusilə vurğulayıb. Müəllif Azərbaycan polisinin respublikada törədilən cinayətlərin açılmasındakı fəaliyyətini işıqlandıran “Şeytanın Siması” kitabının onun sayca üçüncü kitabı olduğunu və mövzunun real hadisələr əsasında qələmə alındığını bildirib.

Tədbir iştirakçılarından DİO-da əməliyyat-axtarış fəaliyyəti kafedrasının müəllimi, polis polkovnik-leytenantı Elxan Rzayev kitab haqqında öz təəssüratlarını bölüşüb və əsərdə 44 günlük Vətən müharibəsi haqqında yazılanları xüsusilə vurğulayıb.
Görüşdə daha öncədən kursantlar tərəfindən mütaliə olunmuş “Şeytanın Siması” əsəri təhlil olunaraq “Mən əməliyyat müvəkkili olsaydım nə edərdim?” sualı ətrafında kursantların rəyləri dinlənilib. Kitabdakı mövzular ətraflı müzakirə edilib və kursantları maraqlandıran suallar müəllif tərəfindən cavablandırılıb.
Sonda Müşfiq Abbasov müəllifi olduğu “Şeytanın Siması”  kitabını ürək sözlərini qeyd edərək tədbir iştirakçılarına və Polis Akademiyasının  Kitabxanasına  hədiyyə edib.