DİN-in Polis Akademiyasının rəhbərliyinin müvafiq əmri ilə təsdiq edilmiş tədbirlər planına əsasən 8 noyabr - “Zəfər Günü” və 9 noyabr “Bayraq Günü” çərçivəsində keçirilən silsilə tədbirlər sürətlə davam edir.
Belə ki, “Zəfər Günü”nə həsr olunmuş silsilə tədbirlərin davamı olaraq 03 noyabr 2023-cü il tarixdə “Krosfit” üzrə yarış keçirilmişdir. Yarışın məqsədi 44 günlük zəfər yolunda canlarından keçərək şəhidlik zirvəsinə ucalan qəhrəman döyüşçülərin xatirəsini uca tutmaq, həmçinin kurslar arasında qarşılıqlı əlaqələrin genişləndirilməsi və şəxsi heyət arasında idmana olan həvəsin artırılmasıdır.

Gərgin şəraitdə keçən yarışın nəticəsində III kursun “Füzuli” komandası III yerə, IV kursun “Mübarizlər” komandası II yerə və II kursu təmsil edən “Zəngilan” komandası I yerə layiq görülmüşdür. Tədbirin sonunda qalib komandalar diplom, medal və qiymətli hədiyyələrlə mükafatlandırılmışdır.
07 noyabr 2023-cü il tarixində isə Akademiyanın böyük sıra meydanında “Zəfər Günü” və “Bayraq Günü”nə həsr edilərək təşkil edilmiş yerbəyer mərasimində kursantar, dinləyicilər, habelə akademiyanın şəxsi heyəti iştirak etmişdir. İlk olaraq şəhidlərimizin əziz xatirəsi bir dəqiqəlik sükutla yad edilib və Dövlət Himni səsləndirilib. Tədbiri Akademiyanın rəis müavini, polis polkovnik-leytenantı Əfqan İmanov açıq elan edərək ümummilli lider Heydər Əliyevin şərəfli həyat yolu və zəngin ictimai-siyasi fəaliyyəti haqqında ətraflı məlumat vermiş, ölkəmizin şərəfli tarixində qeyd olunan əlamətdar günlərin hər birimiz üçün önəmini xüsusilə vurğulamışdır. Belə əlamətdar günlərdən sayılabiləcək 8 noyabr - “Zəfər Günü” və 9 noyabr “Bayraq Günü” münasibətilə mərasim iştirakçılarını həm daxili işlər nazirliyinin rəhbərliyi, həmdə akademiya rəhbərliyinin adından təbrik etmişdir.

Daha sonra Akademiyanın “İctimai elmlər” kafedrasının rəisi, tarix üzrə fəlsəfə doktoru, polis polkovnik-leytenantı Rəhim Məcnunov əlamətdar günlərdən “Zəfər Günü” ilə əlaqədar müasir dövrdə Azərbaycanın əldə etdiyi uğurların dahi tarixi şəxsiyyət, fenomenal lider olan Ulu Öndər Heydər Əliyevin uzaqgörən siyasətinin və hələ 1969-1982-ci illərdə Azərbaycanda həyata keçirdiyi nəhəng quruculuq işlərinin nəticəsi, məntiqi davamı olduğunu bildirmişdir. O, 44 günlük Vətən Müharibəsində qazandığımız qələbəni və Şanlı Zəfər tariximizi Heydər Əliyev siyasətinin təntənəsi adlandırmışdır.
“Dövlət bayrağı günü”nə münasibətdə isə Azərbaycan Respublikasının AXC-nin siyasi və hüquqi varisi olduğunu bəyan edən Ulu öndər Heydər Əliyevin ilk dəfə 1990-cı il noyabrın 17-də üçrəngli bayrağımızı Naxçıvan Muxtar Respublikasının dövlət bayrağı olaraq təsdiq etdiyini, 1991-ci il fevralın 5-də isə Azərbaycan Respublikasının Ali Soveti “Azərbaycan Respublikasının Dövlət bayrağı haqqında” Qanun qəbul edilərək onun Dövlət bayrağı elan edildiyini tədbir iştirakçılarının diqqətinə çatdırmışdır. Fərmana müvafiq olaraq “Azərbaycan Respublikasının Dövlət bayrağı haqqında Əsasnamə” tərtib və təsdiq olunduğunu qeyd edən Rəhim Məcnunov Azərbaycan Respublikasının dövlət bayrağının hər bir vətəndaşımızın qürur mənbəyi, milli qeyrətimiz, şərəfimiz, mövcudluğumuzun və varlığımızın təcəssümü olduğunu fəxrlə vurğulamışdır.
Daha sonra 07.11.2023-cü il tarixdə keçirilən 1-ci dərslərin əvvəlində müəllimlər tərəfindən müvafiq olaraq “Zəfər Günü” və “Bayraq Günü” ilə əlaqədar, eyni zamanda 44 günlük Vətən Müharibəsində zəfərə aparan yol və bu qələbənin memarları barədə kursant və dinləyicilərə ətraflı məlumat verilmişdir.

Eyni tarixdə Polis Akademiyasının yardımçı təsərrüfat sahəsində Polis Akademiyasının rəisi, polis general-mayoru Canpolad Daanovun və akademiyanın şəxsi heyətinin iştirakı ilə Ümummilli lider Heydər Əliyevin 100 illiyinə və Zəfər Gününə həsr olunmuş ağacəkmə aksiyası həyata keçirilmişdir. Aksiyanın keçirilməsində məqsəd ağac əkməklə ekoloji tarazlığın bərpasına, ətraf mühitin qorunmasına kömək etmək, atmosferi oksigenlə zənginləşdirmək, ictimaiyyətin diqqətini yaşıllıqların qorunmasına yönəltməkdir.
Kursantlarla birlikdə ağac əkən Akademiya rəisi belə aksiyaların gələcəkdə ənənəvi olaraq davamlı olacağını, daha mütəşəkkil və əhatəli şəkildə həyata keçiriləcəyini bildirib. Akademiyanın 102 illiyinə təsadüf edən aksiyada simvolik olaraq 102 ədəd zeytun və şam ağacları əkilib, abadlıq işləri aparılaraq ağacların dibi yumşaldılıb, yaşıllıqlara aqrotexniki qulluq göstərilib.

Akademiya tərəfindən bu cür aksiyalar mütəmadi olaraq təşkil edilir, ətraf mühitin mühafizəsinin vacibliyi vətəndaşların, xüsusilə kursantların diqqətinə çatdırılır. Müəllimlərimiz daim kursantları ekoloji problemlərə qarşı mübarizəyə səsləyir, müxtəlif maarifləndirici proqramlara qoşularaq ictimaiyyətin diqqətini ekoloji problemlərin həllinə yönəldirlər.
Polis Akademiyasında mütəmadi həyata keçirilən silsilə beynəlxalq və yerli tədbirlər, həmçinin növbəti günlərdə keçirilməsi planlaşdırılan dəyirmi masa, açıq qapı, müxtəlif idman və intellektual yarış tədbirləri də Akademiyada aparılan işlərin və mütərəqqi inkişafın bariz nümunəsidir.